想自己訂機票去旅行,一定要查閱機票種類及條款。睇唔明唔緊要,睇睇以下10個常見嘅機票英語詞彙,就可以輕輕鬆鬆出機票喇!

1. Travel Class 艙等

一般嚟講,大部分嘅傳統航空公司都分四個艙等,分別係:
Economy Class 經濟客位(機票價錢最平)
Premium Economy Class 特選經濟客位
Business Class 商務客位
First Class 頭等客位(機票價錢最貴)

 

2. Booking class 訂位艙等

Booking class 通常係一個英文字母,代表唔同嘅艙等同機票條件。一般而言,

Y 代表 Economy Class(經濟客位)
C 代表 Business Class(商務客位)
F代表 First Class(頭等客位)

 

3. Extra Legroom Seat 加長空間座位

傳統航空公司 Premium Economy Class(特選經濟客位)嘅座位通常都係 extra legroom seat(加長空間座位),意即座位比較闊落,乘客可以有空間「伸展」吓。

4. Low-cost Airline/ LCC 廉價航空公司

大部分嘅廉價航空公司(Low-cost Airline,簡稱LCC)係冇以上所介紹嘅艙等分級㗎!
廉價航空公司客機嘅座位大部份都比較窄,空間較細。所以,部份廉價航空公司就容許客人加錢,將座位升級至 extra legroom seat(加長空間座位)。
除此之外,飛行期間唔會有免費餐飲提供,乘客嘅行李亦需要付費寄存。

5. Group/ Group Affinity Ticket 團體票

團體票大多數都需要經旅行社 (travel agent) 購買,因為旅行社向航空公司「團購」機票就會得到折扣。
參加旅行團 (package tour) 時,旅行社所安排嘅機票亦大多數屬於團體票。

 

相關文章  酒店房種類大全

 

6. Minimum/ Maximum Stay 最短/最長停留期限

意思係 Outbound flight(去程)同 return flight(回程航班)之間嘅停留期限。
通常,Maximum Stay(最長停留期限)較長嘅機票會比期限較短嘅機票貴。

7. Round-trip/ One-way 來回/單程

Round-trip ticket 係指往返同一地點嘅機票,而 one-way ticket 就係單程機票喇。
P.S. 部分國家會係旅客入境 (immigration) 時查問客人係咪手持 round-trip ticket,外遊前要注意呀!

8. Layover 轉機

Layover 就係指客機飛行時會停留係第三地去加油或者接載乘客,或者指乘客係航班抵達 24小時內,係同一個機場轉乘客機。

9. Stopover 中途停留

Stopover 同 layover 差唔多,都係為咗轉機而進行;但一般而言超過24小時嘅轉機就會被視為 stopover 而非 layover。
乘客係 stopover 期間通常可以離開機場出去市區(前提係要持有該國嘅簽證 (visa)),所以巧妙地運用 stopover 嘅時間,就可以變相遊覽多一個地方!

10. Open-jaw多個目的地/ 中途停留

Open-jaw 嘅意思就係到達同離開嘅地點係唔一樣,例如:
去程:香港> 台北
回程:高雄> 香港
好處係可以玩多一個地方,但中間嘅接駁交通就要自己安排喇!

 

相關文章  必睇!10個常見旅遊優惠字眼